Iban begawai besai enti Jabu nyebut jaku badu

Ulih: Thun Diwan

MUKAH: Tan Sri Jabu lalu enda engkeretik taja pan Pehin Sri Taib enggau Tan Sri Dr George Chan udah merambu deka narit diri ari ngetan penuduk seduai iya ba pengawa bepilih besai menua ti deka datai tu ila.

Dipelabaka agi mayuh orang ba menua tu rinduka Tan Sri Dr Chan ngambika mengkang mangku pengawa iya jadi Sapit Kepala Menteri ti dibandingka enggau Tan Sri Jabu.

Pehin Sri Taib enda ibuh disebut laban iya sigi semampai disayauka mensia mayuh ukai semina tuai parti politik tang mega orang siku-siku ba menua tu.

Nama kebuah Tan Sri Jabu takut nyebut jaku badu..? Kebuah ia laban Tan Sri Jabu nemu empa diri empu ngelama tu ti udah.

Iban patut nyukung Norah jadi Kepala Menteri

Ulih: Thun Diwan

MUKAH: Raban bansa Iban patut merisukung ti enda belampung ati enda nyema Kaban Parlimen Tanjung Manis Datuk Norah Tun Rahman dipaduka nganti Pehin Sri Taib jadi Kepala Menteri Menteri Sarawak.

Kebuah pia laban kitai nadai orang bukai agi ti tau disukung kelimpah ari orang ti dipaduka ngiring perintah Barisan Nasional (BN) menua tu.

Nambah mega Datuk Norah taja pan iya baru dalam pengawa politik, tang iya siku ari anak bekau Kepala Menteri sereta bekau Tuai Mega Menua ti dulu suba.

Jabu kilar ba bansa Iban

by Thun Diwan

MUKAH: Sapit Kepala Menteri, Tan Sri Jabu ak Numpang berengkah baru mansutka jaku kelulu betanam betupi nampung ti kala disebut iya bisi 20 taun ti udah lalu.

Lebuh ti megai Opis Menteri Betanam Betupi ba taun 80-an suba dia Jabu bebendar amat kulu kili meransang kitai Iban betupi enggau betanam laban kenu ku iya nya aja jalai kena ngemansangka pengidup orang Iban ba menua ulu.

Jabu lebuh maya nya lalu ngansak orang rumah panjai bekebun koko nyentukka abis getah ditebang laban pengagit ti deka ngulihka belenja kena ngidupka diri.

Berebak enggau tu Jabu mega lalu ngansak orang nanam kepayang laban ku iya buah tu tinggi amat rega lalu ulih dijual ngagai menua tasik kelebih agi Singapura.