RGC nguntung Jabu, ngerugi rakyat

Ulih: Thun Diwan

MUKAH: Rural Growth Centre ti dipelandikka Tan Sri Jabu ulih nyaup ngangkatka pengidup mensia mayuh ba menua pesisir kenyau ari 2o taun ke udah, diatu tak semina dipeda nguntungka iya empu.

Mayuh endur palan pemansang menua pesisir tu udah ditumbuhka ba Sarawak, tang siti ari palan nadai nguntung mensia mayuh.

Palan tu nyata enda ulih ngubahka pendiau pengidup orang ba menua pesisir, lalu ukai munyi ti dipadah Jabu.

Nama kebuah Jabu belandik amatka palan tu kelia? Kebuah ia laban ari sigi tanah. Tanah tau ti tau mai penguntung ngagai Jabu.

Kita enda ibuh meda palan tu ba menua bukai, peda aja ia ti bisi digaga ba kaki tangga rumah panjang Jabu empu nyendi simpang layar 'Pusat Pertumbuhan Desa Layar' ba Ensurai menua endur Jabu ada kelia.

Ni pemaju palan tu udah dipeda kita? Enti orang ti selalu bekenaka jalai alun ari menua adap ke atas nurun ke baruh menua tu lalu pulai mansang, rindu agi orang ngetu ba palan pemakai endur bukai, baka Jelukong, Palan Pemakai Temudok.

Lubah amat orangka ngetu ba RGC Jabu Ensurai ba Layar. Nama kebuah pia, nya nandaka palan tu endang nadai reti.

Ti nyema orang bisi ngetu dia semina meli minyak udah nya bejalai baru. Enti nadai stesen minyak dia udah lama RGC Jabu tu nya tinggai tembawai.

Taja pia RGC tu udah mayuh nguntung Jabu tang pan ia enda mai penguntung ngagai mensia mayuh.

Jabu ngulih untung ari tu berengkah ari langgur deka nunduhka palan pemansang nya ba kaki tangga rumah panjai iya empu.

Lebuh ti ngelanggurka tu dia Jabu lalu belabuh meli tanah adat mensia mayuh ba kandang nya kena rega dua tiga ratus seika.

Udah dibeli dia perintah lalu belabuh mayar pampas tanah nya, lalu dipeda dia semua tanah nya enggi Jabu magang.

Enda ibuh nyebut penyampau pampas tanah nya, laban enda dipeda, nadai pengerami diatur beserimbai enggau mayar pampas tanah nya ngagai Jabu.

Ukai nya aja, Jabu terus mutik untuk ari ngaga RGC berengkah ngelasi tanah, nudukka rumah sereta enggau ngaga rumah ba kandang palan pemansang nya.

Pelin kandang pemansang nya mega dipegai Jabu lalu kontraktor ti ngatur pengawa dia semua bisi bekaul enggau Jabu.

Tu baru siti palan pemansang, enti udah 20 palan pemansang ba menua Sarawak berapa juta dipelabaka kita untung Jabu ari nya.