Manah agi jadi Mayas ari masuk skim Salcra Jabu

Ulih: Thun Diwan

MUKAH: Salcra udah madahka diri siruka raban jelu siga lebuh ti ngungkupka belanja RM30,000 kena melanja siku Mayas ba Palan Penyaga Jelu Siga Semenggoh, Kuching ba timpuh tiga taun ti deka datai tu ila.

Tu nyayanka pemereti ati enggau penyiru gerempung ti dipegai Tan Sri Jabu tu ngagai jelu bebanding enggau mensia.


Bisi 15,000 orang ti masuk skim Salcra nengah 50,000 ekar tanah ti dikemansangka gerempung tu ba menua tu ngelama tu ti udah.

Uji peratika penyampau dividen ti diterima sida tu siku-siku ninting taun enti bisi manggai ngagai bepuluh ribu baka ti diberi ngagai Mayas nya.

Ambika chonto 2008, Jabu madahka gerempung ti tau ngangkatka pengidup orang ba menua pesisir tu udah ngeluarka dividen RM37 milion ngagai orang ti masuk skim kepala sawit dipegai gerempung tu.

Enggau nya enti dibagi dia sida tu nerima RM2,333 tiap iku ba taun nya.

Nyangka nya bula, lalu diatu uji peratika dividen RM53 milion ti diberi Salcra ba taun 2009 sereta ia ti pemadu tinggi kala diberi kenyau ari gerempung ti dipelandikka Jabu tu udah ditumbuh.

Ba taun nya enti dibagi dia ninting iku bala orang ti masuk skim Salcra tu nerima RM3,533.

Digumpulka penyampau dividen ti ulih ba dua taun nya dia tiap-tiap iku orang ti masuk Salcra tu baru nerima RM5,866.

Lalu ba taun ti deka datai Jabu udah belabaka Salcra ulih meri RM50 milion ngagai bala orang ti masuk ba skim gerempung tu tau bulih RM3,333 siku-siku.

Dalam tiga taun nya dia tiap iku sida tu nerima RM6199 ari asil tanah sida ti dikemansangka Salcra.

Ba tu enda ibuh bejaku pasal penguntung enggau pengerugi tau gerempung tu ulih ngingkas orang ba menua pesisir ari sintak amba pnyeranta, tang semina ngenangka Salcra ngungkup RM30,000 kena melanja siku Mayas ba palan jelu siga tu.

Ungkum belanja nya kena nyaga Mayas tu tadi dalam tumpuh tiga taun.

Nyadi ba pekara tu dia Mayas nya bulih dividen ti besai agi ari ti diterima siku-suku orang ti masuk skim SALCRA dalam timpuh tiga taun ti ba penyampau RM6,199.

Tu ngayanka manah agi orang ti masuk Skim Salcra jadi Mayas.

Ungkup belanja ngagai Mayas tu disuaka pengari ari Salcra ba siti pengerami ngumpul belanja ngiru mayas apin lama ti udah.

Pengerami tu dikemataka Menteri Muda, Mohd Naroden Majais.