Friday, September 3, 2010

Jabu, Manyin, Gramong, Blikau patut diketu

Ulih: Thun Diwan

MUKAH: Chermin Barisan Nasional  Pehin Sri Haji Abdul Taib Mahmud netapka 20 peratus ari pengari Parti Pesaka Bumiputera Bersatu Sarawak (PBB) ti deka disabung ba pengawa bepilih besai menua tu ti deka datai tu ila,  iya nya orang baru.

Enti nitihka penerang chermin BN tu, dia Sayap Pesaka patut bepanggai ba penemu nya lalu berati  ngetuka 20 peratus tauka mayuh agi kaban kunsil nengeri sayap nya ti bisi diatu.

PBB patut berunding ngetuka semua kaban kunsil nengeri ari Sayap Pesaka ti udah lama,  nadai pengering runding,  suntuk penemu sereta nadai ati deka bejalaika tangung pengawa dir agi.


Taib sereta  Chermin Komiti Milih Pengari Pengawa Bepilih PBB patut ari diatu beratika  bala kaban kunsil nengeri ari sayap tu ti patut ditingkilka maya nya ila.

Lalu pia mega komiti tu patut berati narit Kaban Parlimen ari sayap tu ti bisi diatu ngambika tau nganti sekeda ari sida  tu ila kena napi ubah perintah menua ti deka datai.

Taja pia enti dipeda ari pengeluya dia mayuh kaban kunsil nengeri ari Pesaka patut ditingkil.

Enti dipeda ngena mata kasar dia sida ari Sayap Pesaka ti tau diketuka  iya nya Tan Sri Jabu, Michael Manyin, Gramong Juna enggau Ambrose Blikau.

Nama kebuah pia ambika banding Jabu, iya udah jadi Sapit Kepala Menteri tang naka kediatu Jabu nadai selinting pemansang ngagai raban bansa Iban.

Kenyau ari mangku pengawa nya, Jabu lalu enda ulih ngayanka tanda pemujur ngemansangka bansa Iban sekumbang udah mangku pengawa nyadi sapit kepala menterilebih ari 20 taun ti udah.

Tu nyangka ukai ketegal iya enggai, tang dipelabaka Jabu enda tentu ckukup penemu ti ngasuh iya puntan ba pengawa iya.

Enggau tu Jabu udah bebebulaka diri empu,lalu diatu iya udah suntuk runding lalu semina temegah ati laban udah ulih ngangkatka ruang bilik diri.

Ari nya Komiti Pengawa Bepilih Besai PBB enda patut sanggu ningkilka Jabu ti udah dibai umur lalu enda ulih napi tanggungg panengawa iya agi dudi ila.

Ambrose Blikau nyangka ukai ketegal nadai penemu kena ngemansangka bansa Iban, tang orang tu semina deka sula lalu ngerindang diri  lebuh maya gawaka rayat.

Blikau nadai tentu ari berunding deka mai pemansang ngagai rayat lebuh iya ti mangku pengawa Penulung Menteri suba.

Kaban Kunsil Nengeri Katibas tu diatu nyau majak ngelusu bejalaika pengawa pemansang ngagai rayat, udah ti ditinggilka ari pengawa penulung menteri sereta Sekitari Besai PBB.

Gramong Juna sekumbang ti udah nyadi penulung menteri kenyau ari 80-an kelia mega lalu enda teayanka tanda pemujur diri mai pemansang ngagai bansa Iban.

Kaban Kunsil Nengeri Machan tu diatu mega udah dibai umursereta pengelama udah gawa lalu diatu iya nyangka nadai agi ati deka berundingka pengawa ngemansangka rayat.

Orang tu dipelabaka nyau bansu ngatur pengawa kena mai pemansang.

Michael Manyin lain agi ulah Kaban Kunsil Nengeri Tebedu tu kelalu balat gelugi diri lebuh bejalaika tanggung pengawaka rayat.

Ketegal nya dia semua pekara pemansang ti dilanggurka iya nyau puntan magang.

Taja pia enda tentu temu pemuntan langgur nya, tang ia ti nyata amat ia nya  lebuh ti jadi menteri pengawa berumah suba Manyin lalu nadai ngaga ubah ba atur rumah, tang mayuh agi pengawa ti dikereja  iya nutup  pemansang berumah ba menua tu kelebih agi ngagai raban bansa.

Sekumbang ti udah megai pengawa nyadi Menteri Pemansang Infrastruktur enggau Penyambung diatu, Manyin tak semina nitihka rentak orang bukai ari ti mantaika penemu diri.

Nya alai Komiti Pengawa Bepilih PBB enda tau sanggu ditinggilka orang empat tu lalu diketuka ba pengawa belilih ti deka datai.

Sida tu udah ngayanka pengelandik diri tang semua pengawa sida puntan.

2 comments:

  1. betul nya. dr james pun patut badu nadai pemansang ngagai menua kapit sampai ka jalai ngagai sibu pun badau di gaga iya. semina ka jako cina aja nya.

    ReplyDelete
  2. Yb iban nadai kala dinger bejako ka ngering ka bangsa iban. semina dinger di paper buka balai raya enggau utai bukai enda patut gaga sida. mawan nama udah gaga iya ngagai bangsa iban. bisi party tauka dinner baru bisi.

    ReplyDelete