MUKAH: Raban Bansa Dayak kelebih agi Iban ba menua tu tau enda ibuh terunda enggau ulah sekeda tuai ti deka mai Umno masuk ngagai menua tu.
Kebuah pia, laban Iban patut ngetanka parti politik asal menua tu ti ngembuan polisi enggau dasar ti ngam kena ngemansangka raban bansa Iban.
Kebuah bukai ia nya semua parti politik ti ditumbuhka kena ngamansangka bansa Iban ba menua tu agi tegap sereta angkun bejalaika tanggung pengawa sida ngemansangka bansa enggau menua.
Ambika banding Parti Pesaka Bumiputyera Bersatu Sarawak (PBB), Parti Progresif Demokratik Sarawak (SPDP) enggau Parti Rakyat Sarawak.
Tiga iti parti tu udah ngayanka diri sigi bebendar bejalaika polisi nulung bansa Iban lalu udah nyata mujur.
Pemujur PBB enda ibuh disebut agi laban parti gempung entara Pesaka ti ngarika Dayak enggau Bumiputera ngarika Melayu tu udah lama ngayanka diri ulih nulung rayat sereta ngemansangka menua tu nengah perintah Barisan Nasional.
Enti nyema Umno masuk ke Sarawak, pemedis keterubah deka diasaika rayat menua tu ia nya pangka dasar enggau polisi parti nya ti enda ngam ba bansa Iban.
Dasar enggau polisi ti dipejalaika Umno tu semina ulih dikena ba Semenanjung lalu deka ngemediska Iban enti nyema ia dipejalaika ba menua tu.
Enda ibuh kitai merening jauh, ilau aja ngagai Sabah ti udah dipegai Umno beberapa taun ti udah.
Rayat ba menua tu mayuh udah mansutka sebana ketegal polisi enggau dasar ti dipejalaika parti tu ba rayat laban enda ngam ba sida.
Nya alai enda ibuh kiruh berunding panjai lalu enti nyema bisi orang kimpin mai masuk Umno tau enda ibuh digulu laban sida nya ngepunka penusah dalam idup Iban
Seraban tuai Iban enggau Melayu ari menua tu apin lama ti udah bisi betemu enggau pengari tuai ari Umno ti berandau pasala deka ngerembaika Umno ke Sarawak.
Tuju sida deka numbangka parti asal menua tu baka PBB, SPDP enggau PRS.
Umno deka dibai masuk nguasa menua Sarawak
No comments:
Post a Comment