Rundi menyatika bansa diri

Ulih: Thun Diwan

MUKAH: Dr Stephen Rundi Utom ti mega Penulung Menteri Perengka Diguna Mensia Mayuh iya nya siku tuai rebak baru ti dipelebaka tau ngeringka bansa Iban suba, diatu udah ngayanka diri limpang ari sangka mensia mayuh nya.

Rundi ti mega Kaban Kunsil Nengeri Kemena ukai semina empelitaka orang Iban, tang iya mega nyaup orang bukai munaska reta tengkira enggau pesaka bansa diri, kena ngulihka penguntung diri.

Mayuh kes tanah pesaka (NCR) ba Kemena dikumbai tanah perintah lalu diambi kompeni endur nanam kelapa sawit bedandang besai, kena nguntung sida empu.


Rundi ti mega Sekitari Besai Parti Pesaka Bumiputera (PBB) ukai semina mejam mata diri meda penusah tu, sinu agi ngenang lebuh iya kemendarka pengawa kompeni tu ti bambika tanah adat bansa iban nya.

Enda chukup enggau pengawa ti ngambu NCR tanah perintah, rumah panjai ti dipadahka didiri ba tanah perintah lalu dirumpang.

Pekara ti ngenyinuka ati tu udah ditemu sereta menua lalu didinga semua serak raban dalam bansa Iban ba menua tu.

Rundi anang ke nulung nyaup orang ngerampas reta bansa diri empu baru bisi.

Parti Keadilan Rakyat (PKR) taja pia kembuan penyinu ati ngagai raban bansa Iban ti udah dipenyatika Rundi enggau kompeni luar tu tadi.

Raban PKR enggau luya sida lalu nyidik kes tu ngagai genturung pendiau raban bansa Iban tu tadi kena nentuka pekara ti bendar nyadi.

Raban luya sida tu lalu tetemuka pengamat tanah ti udah diambi kompeni tu tadi ukai tanah perintah tang endang tanah pesaka Iban.

Kes lalu dibai ngagai kut dia mayuh sida tu udah menang lalu dikelala nyadi tanah adat.

Nya alai ba tu raban bansa Iban ba sitak Kemena patut meri kelala ngagai PKR ti udah nulung sida lalu ukai pengari sida Rundi.